Plantun de Prouvènço

Pèr coumpara dos planto d'encò nostre

Thymus nervosus & Myosotis arvensis

Ferigouleto(-de-Ventour)

Thymus nervosus

Lamiaceae Labiaceae

Àutri noum : Farigouleto, Serpoulet, Badassoun, Menudet.

Nom en français : Thym à nervures saillantes.

Descripcioun :
Aquelo meno de ferigouleto s'atrobo sus lou cresten de Ventour ounte fai d'iero mai o mens grosso. Li fueio di ramo soun proun enlaçado e sarrado. D'après li darrièris estùdi sarié la memo meno qu'aquelo di Pirenèu ounte i'èi mai courènto. Es uno endemico d'aquéstis endré.

Usanço :
La ferigouleto-de-Ventour a à pau près li mémi prouprieta qu'aquéli de la ferigoulo estènt quand meme mens forto. Pamens vau mies de pas l'acampa qu'es uno planto endemico au nostre, e de ferigoulo n'avèn proun.

Port : Pichoto planto lignouso
Taio : 10 à 50 cm
Fueio : óupousado
Tipe bioulougico : Camefite
Cicle bioulougico : Planto renadivo

Gènre : Thymus
Famiho : Lamiaceae
Famiho classico : Labiaceae

Ordre : Lamiales

Coulour de la flour : Roso
Petalo : irreguliero
Ø (o loungour) flour : Pancaro entresigna
Flourido : Printèms - Estiéu

Sòu : Ca
Autour basso e auto : 1800 à 2800 m
Aparado : Noun
Remarco : Endemico dóu Ventour
Jun à juliet

Liò : Tepiero roucaio
Estànci : Subaupen à Aupen
Couroulougi : Ouroufito-Sud-Ouèst-Éuropenco
Ref. sc. : Thymus nervosus J.Gay ex Willk., 1893

Te-vese-e-t'ame(-de-champ)

Myosotis arvensis

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis des champs, Myosotis intermédiaire.

Descripcioun :
Aquéu te-vese-e-t'ame trachis di plano de coustiero fin qu'en mountagno. Es uno planto coumuno, mai pas toujour eisado de destria de si cousino. Dins lou group di flour pichoto (1 à 4 mm), soun pulèu li mai grando, si cambo soun un pau mai espésso (> 1mm), e emé d'enflourejado que fan mens de la mita de la planto. Se recounèis classicamen que li pecou di flour d'en bas dèvon èstre dous cop mai long que li sepalo di flour, mai sèmblo pas toujour lou cas.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").